مشاكل الحب من طرف واحد

بحب واحد واخطبت لغيره




السلام عليكم ورحمه الله وبركاته انا عندي مشكله جامده اوي وبجد محتاره اوي ومش عارفه اعمل ايه .. انا بحب واحد وكنا مرتبطين وحصل بينا مشاكل كتير وكلها بسببي وانا عارفه ان انا الغلطانه وسيبنا بعض اكتر من مره ورجعنا تاني لكن اخر مره قالي مش هبقي راجل لو رجعتلك علشان انتي بتيجي علي كرامتي جامد وكلام كده … بعدين انا كنت لسه بحبه حاولت كتير اننا نرجع لكن هو مرضاش كنت كل شهر تقريبا بكلمه ونتكلم بس يقولي بحبك ومش هرجعلك .. في مره اتصلت عليه لقيت واحده ست كبيره جنبه بتقولي من بيد ده خطب وهيتجوز .. انا طبعا اتصدمت جامد اتنرفزت عليه جامد وقفلت لقيته بيتصل ويقولي محصلش انا مخطبتش قولتله ماتكلمنيش تاني .. وكان في واحد بيحبني اوي متقدملي وعارف الحكايه قالي انا هنسيكي كل حاجه وهخطبك وهساعدك ..المهم الاول انا مكنتش راضيه خالص علشان خايفه اظلمه .. بس الضغط من كل ناحيه اهلي شايفينه كويس وهو فعلا انسان محترم وطيب اوي وكمان حالتي النفسيه كانت وحشه جدا وحاجات كتير اي في بعضها .. وافقت عليه واتخطبت .. رجع اللي كنت بحبه يحاول يوصلي باي شكل هو مش كان ليه في النت خالص بقي كل يوم يدخل ويكلمني وكلام ليه معني .. المهم اني اتكلمت معاه حلفلي انه مش خطب وانه بيحبني وعمره مانساني واني السبب في كل اللي حصل .. مبقتش عارفه اعمل ايه خايفه اخسر خطيبي وكمان ده خايفه منه ومش مطمنه ليه .. لكن بحبه بردو .. بجد حاسه اني محتاره جامد اوي ومش عارفه اخد قرار .. خطيبي طيب اوي لكن انا مش عارفه اتعامل معاه حاسه اني بتكلم معاه وبعامله بطريقه غريبه ومش قادره بجد اكلمه زي اي واحده مخطوبه مابتكلم خطيبها وهو بيقولي انتي معندكيش غير كلمتين طيب وماشي .. انا مش عارفه اعمل ايه نفسي بجد اقرب من خطيبي ومش عارفه بجد .. نفسي اطمن للي بحبه مش عارفه ولا عارفه اخد قرار انا عايزه مين .. وعلي فكره ظروف خطيبي احسن كتير اوي من التاني .. لكن يمكن علشان العشره باقيه عليه رغم ان الحب مش موجود جوايا اوي بس يمكن بحن لايام زمان نفسي في الاحساس ده يرجع تاني والمشكله انه دلوقت بيعاملني معامله غريبه اوي وبحس انه عايز يبعدني عنه ويقربني منه مش عارفه ازاي لكن هو كده لما بنتكلم بيهزر كتير زي هبل في الكلام لكن لما بقي يدخل الكلام في الجد ونتكلم وصلت ان احنا الاتنين عيطنا وقالي انه بيحبني وعمره ما حب غيري وياريت ينفع نرجع بس لو رجعنا هنظلم واحد تاني وخايف ربنا مش يكرمنا لما نتجوز وبردو اوقات بيحاول يزهقني ولما اقوله خلاص زهقت يتعدل تاني اول مايلاقيني هبعد .. ياريت يكون في حل انا بجد دماغي هتنفجر مش عارفه اعمل ايه والله